Seria A/ Formacioni ideal i vitit, Hysaj mbrojtësi i djathtë më i mirë

Elseid Hysaj përfshihet në Formacionin Ideal të Serisë A, duke u cilësuar mbrojtësi më i mirë i kampionatit elitar në Itali në mbylljen e vitit 2015.

Në sondazhin e zhvilluar nga Calciomercato.com, mbrojtësi i Napolit ishte në garë me Alessandro Florenzi-n e Romës, Bruno Perez të Torinos dhe me Sime Vrsaljko të Sassuolo-s.

Me Serinë A që mbylli aktivitetin prej pauzës së ndërrimit të viteve, në Itali ka nisur bilanci për këtë pjesë të sezonit. Skuadrat e Seria A do të kthehen në fushë më 6 janar, janë të shumtë lojtarët që kanë shkëlqyer deri më tani.

“Calciomercato.com” hapi sondazhin për Formacionin ideal të këtij fillim sezoni, duke përzgjedhur katër lojtarë për secilin rol, në skemën 4-2-3-1. Deri më tani janë përzgjedhur dy emra: Handanovic i Interit në portë që triumfoi përballë Donnarumma-s së Milanit, Reina-s së Napolit dhe Buffon të Juventusit.

Votimi vazhdoi me mbrojtësin e djathtë, aty ku Elseid Hysaj fitoi në mënyrë të pakontestueshme, teksa 21-vjeçari kuqezi vlerësohet për ecurinë fantastike te Napoli, ku është kthyer në një prej pikave të forta të skuadrës.