Shmanget tragjedia në Holandë, shembet nga era stadiumi i Alkmarit

Shmanget tragjedia në Holandë pas shembjes së një pjesë mbuluese të stadiumit të Alkmaarit, për shkak të motit të keq. Një pjesë e çatisë nuk ka mundur t’u rezistojë erërave të forta, duke rënë mbi ndenjëset e tifozëve.

Për fat të mirë, skuadra e AZ Alkmaar, këtë javë luan në transfertë me Waalwijk (të dielën), kështu që është shmangur një tragjedi njerëzore, pasi nëse do të ndodhte në momentin e një ndeshjeje, pasojat do të ishin katastrofike.

“AFAS Stadion” ka një kapacitet prej 17 023 personash dhe është ndërtuar në qytetin e Alkmaarit, 25 milje në veriperëndim të kryeqytetit të Holandës, Amsterdam.