Suarez: Neymar bëri gjithçka për t’u rikthyer te Barcelona

Transferimi më i përfolur i verës, nuk u konkretizua asnjëherë edhe pse pati shumë zëra. Neymar kërkoi me çdo kusht rikthimin te Barcelona, por nuk u gjet gjuha e përbashkët mes të dyja klubeve për shifrën e transferimit.

Duke folur për “Fox Sports Radio” në Argjentinë, sulmuesi i Barcelonës, Luis Suárez ka konfirmuar se Neymar bëri të pamundurën që të kthehej sërish në “Camp Nou”. Uruguajiani, i cili ndan një grup në Whatsapp me Neymar dhe Lionel Messin, deklaroi se nuk flisnin shumë gjatë kohës që merkato ishte e hapur.

“Ne mezi kemi biseduar me njëri-tjetrin gjatë ditëve të fundit në atë grup në Whatsapp. Tani që merkato është mbyllur, e kemi më të thjeshtë. Unë mund t’ju siguroj se ai bëri gjithçka që mundi për t’u rikthyer.”

Neymar mund të ndjekë një tjetër rrugë për t’u rikthyer te katalanasit gjatë muajit janar ose gjatë verës së ardhshme. /R.Lika-Koha Jone/