Tirana ndalet ndaj Shënkollit në Kupë, ekipet e tjera të mëdha bëjnë detyrën

Sporti E Premte, 1 Tetor 2021 15:02

Tirana ka shkaktuar surprizën më të madhe në Kupën e Shqipërisë. Kryesuesit e Kampionatit nuk kanë shkuar më shumë se një barazim pa gola në Grupin A ndaj Shënkollit. Bardheblutë me shumë rotacion në formacion, janë ndalur përballë lezhjanëve në këtë sfidë edhe pse kanë krijuar një mori rastesh, duke shtyrë diskutimin për kualifikimin në ndeshjen e kthimit.

Flamurtari vijon ecurinë negative edhe në Kupë, teksa është mundur 3-2 nga Veleçiku. Çokaj shënoi për vendasit, por vlonjatët u përgjigjën me dy gola të Hoxhajt. Megjithatë, Veleçiku gjeti edhe dy herë të tjera rrjetën dhe mbylli ndeshjen e parë me fitoren 3-2, duke mbajtur gjithsesi në ankth Flamurtarin për kualifikimin e mëtejshëm. Teuta dhe Partizani kanë arritur që të fitojnë, edhe pse i kanë zgjidhur ndeshjet në fraksionin e dytë.

Në Grupin B nuk ka pasur shumë surpriza, pasi pretendentët si Kukësi, Skënderbeu dhe Bylis kanë arritur të marrin fitore bindëse në ndeshjet e para duke siguruar thuajse kualifikimin. E papritura e ditës ishte Laçi, i cili mbylli ndeshjen pa gola përballë Elbasanit, një skuadër e Kategorisë së Parë e cila për më tepër po kalon një formë jo edhe aq të mirë. Ndeshjet e tjera duken të hapura, për kthimin, edhe pse në fakt Luftëtari bëri një hap shumë të mirë me suksesin në minutën e fundit ndaj Turbinës në transfertë.

Një ndeshje nuk u luajt, pasi Kamza nuk u paraqit për duelin me Apoloninë duke bërë që të përjashtohet nga Kupa në këtë edicion dhe në atë të ardhshmin.