“Vdekje për shqiptarët”, kore raciste në Bullgari gjatë stërvitjes së Kosovës

Skena të turpshme janë regjistruar sot në kryeqytetin e Bullgarisë Sofje vetëm dy ditë para sfidës mes Bullgarisë dhe Kosovës për grupin A kualifikues të Euro 2020. Kosova po kryente stërvitjen në stadiumin e CSKA-së së Sofjes, dhe në momentin që kishte mbyllur përgatitjet, disa prej lojtarëve po bëheshin gati për të dhënë intervista për gazetarin Florim Canoll,  i cili do të realizonte edhe një lidhje live me emisionin Kuqezi në Supersport.

Në këtë moment, nga jashtë stadiumit ishin dëgjuar thirrje raciste nga disa tifozë bullgarë, të cilët bërtisnin: “Vdekje për shqiptarët”. Duke parë këtë situatë, lojtarët dhe stafi i Kosovës ndërprenë dhënien e intervistave, dhe u futën menjëherë në autobus për të shkuar drejt hotelit ku po qëndron ekipi.