Vllaznia merr dhe fitoren e dytë në Champions League, pranë kualifikimit

Vllaznia e femrave ka marr fitoren e dytë në Ligën e Kampioneve të Europës. Ajo ka mundur mesditën e sotme kampionen e Maltës, Birkirkara me rezultatin 1-0, megjithatë për t’u kualifikuar ekipit shkodran i duhet të fitojë edhe ndeshjen e tretë, atë me ekipin vendas të Lituanisë.

Në minutën e 16-të amerikania Doyle kaloi në avantazh vajzat kuqeblu. Një gol që i dha qetësinë skuadrës shkodrane, që dominoi në lojë, madje duke krijuar raste të tjera shënimi, por që nuk janë konkretizuar dot.

Gjërat nuk ndryshuan deri në fund dhe përfundimisht 1-0 për kampionen e Shqipërisë. Ajo udhëheq grupin 10 për momentin me pikë të plota 6, por për t’u kualifikuar për në turin e dytë të këtij kompeticioni të rëndësishëm duhet të fitojë dhe ndeshjen e së martës me skuadrën vendase Gintra.