Zbulohet motivi i largimit të Migjen Bashës nga kombëtarja

Vetëm disa javë pasi komunikoi lamtumirën e tij nga kombëtarja shqiptare, Migjen Basha konfirmoi edhe largimin nga Arisi i Selanikut. Mesfushori shqiptar edhe pse kishte kontratë deri në fund të sezonit me skuadrën greke, ditën e martë zyrtarizoi prishjen me konsensus të marrëveshjes duke u shndërruar në një lojtar të lirë në treg.

Ish-mesfushori i Torinos do të transferohet te Melbourne Victory në kampionatin australian aty ku ka lënë gjurmë një tjetër futbollist shqiptar pikërisht Besart Berisha, i cili për momentin është gjithashtu lojtar i lirë si Basha dhe është në kërkim të një skuadre të re në Australi.

33-vjeçari është shumë pranë transferimit në një kontinent të largët si Australia dhe kjo ka ndikuar edhe në zgjedhjen e tij për t’u tërhequr nga kombëtarja shqiptare pasi udhëtimet Australi-Shqipëri do t’i merrnin shumë kohë dhe do të rezultonin shumë të lodhshme për Migjenin.