Në mbledhjen e Komisionit për Çështjet Ligjore, Administratën Publike dhe të Drejtat e Njeriut, nënkryetarja dhe deputetja e LSI-së, Erisa Xhixho i bëri thirrje Avokatit të Popullit, që të shohë dy çështje konkrete. ”E para për arrestimet e paligjshme dhe dhuna e ushtruar ndaj qindra qytetarëve në protestat e muajve të fundit. E dyta ka të bëjë me stafin e pamjaftueshëm pranë institucionit të Avokatit të Popullit për adresimin e dhunës dhe abuzimit ndaj fëmijëve”,-shkruan Xhixho në facebook.
Postimi i plotë
Sot në mbledhjen e Komisionit për Çështjet Ligjore, Administratën Publike dhe të Drejtat e Njeriut i kërkova Avokatit të Popullit adresimin e dy çështjeve konkrete.
E para për arrestimet e paligjshme dhe dhuna e ushtruar ndaj qindra qytetarëve në protestat e muajve të fundit. Në një nga pikat e saj, rezoluta e Parlamentit Europian, e miratuar më 19 maj 2022, adresoi edhe lirinë e tubimit. LSI ka depozituar në mars të këtij viti nismën ligjore për zbatimin e vendimit të Gjykatës Kushtetuese për amendimin e nenit 262 të Kodit Penal.
Kuvendi i Shqipërisë e ka detyrim ligjor plotësimin e këtij amendimi. Por ende 5 muaj pasi ka mbaruar afati i lënë nga Kushtetuesja, nuk ka ende asnjë reflektim nga institucioni ligjvënës i vendit. I kërkova Avokatit të Popullit informacion nëse kjo është pjesë e rekomandimeve të tij.
E dyta ka të bëjë me stafin e pamjaftueshëm pranë institucionit të Avokatit të Popullit për adresimin e dhunës dhe abuzimit ndaj fëmijëve. Është në detyrën tonë që në momentin e parë të alokojmë buxhet që stafi të jetë mjaftueshëm i plotësuar për të trajtuar raste të tilla, duke u nisur nga gjendja alarmante dhe pasiguria e prindërve për rastet e abuzimit në shkolla. Mjafton të kujtojmë këtu rastet e fundit në Lushnje, Kamzë apo Berat.
Mësues edhe të dënuar për ngacmim seksual janë përfshirë sërish në sistemin arsimor.
I kërkova institucionit të Avokatit të Popullit të përfshijë në mekanzimat e nxitjes së mbrojtjes së fëmijëve propozimin tone për “Regjistrin kombëtar të të dënuarve për krime seksuale”.
