Hiqet Non-Grata e Berishës, DASH: U bënë disa përjashtime, i shërbejnë interesit të Amerikës

Aktualitet Kryesore E Enjte, 11 Qershor 2026 19:23

Departamenti Amerikan i Shtetit ka sqaruar deklaratën e Sali Berishës, kur tha se i është hequr ”non-grata”. DASH thekson se janë përjashtime për disa nga përcaktimet e nenit 7031, ku është bazuar non-grata e pesë viteve më parë.

”Departamenti i Shtetit ka lëshuar përjashtime (waivers) për disa përcaktime sipas nenit 7031(c), të vendosura nga administrata e mëparshme, pasi dhënia e këtyre përjashtimeve i shërben një interesi kombëtar bindës të Shteteve të Bashkuara”, deklaroi një zëdhënës i DASH për mediat shqiptare.

Sipas përcaktimeve të DASH, waiver do të thotë përjashtim nga zbatimi i një mase ose kufizimi, i dhënë nga autoriteti që e ka vendosur atë. Në rastin e Departamentit të Shtetit të SHBA-së, një waiver nuk do të thotë domosdoshmërisht se vendimi fillestar është anuluar. Ai do të thotë se për arsye të caktuara (shpesh të lidhura me interesin kombëtar të SHBA-së), personi ose subjekti përfiton një përjashtim nga pasojat e atij vendimi.

Për përcaktimet sipas nenit 7031(c), të cilat zakonisht lidhen me akuza për korrupsion të rëndësishëm ose shkelje të rënda të të drejtave të njeriut dhe sjellin ndalim hyrjeje në SHBA për personin dhe familjen e tij, një ëaiver mund të nënkuptojë që: kufizimi i udhëtimit nuk zbatohet në një rast të caktuar; personi lejohet të hyjë në SHBA për arsye specifike; ose disa pasoja të përcaktimit pezullohen.

Në seancën e sotme plenare në Kuvend, kreu i PD-së, Sali Berisha u prit me duartrokitje nga grupi opozitar. ”U ktheva! Nuk kam qenë kurrë non-grata në SHBA, ka pasur vetëm një ndalim hyrje. Kam pasur komunikim zyrtar”, tha Berisha për gazetarët jashtë Kuvendit.

Lexoni edhe: