Negociatat, Balla: Raporti i PACE vlerëson se kemi përmbushur angazhimet më 25 prill

Kreu i grupit parlamentar të Partisë Socialiste, Taulant Balla, deklaron se zgjedhjet parlamentare të 25 prillit kanë marrë vlerësim pozitiv nga raporterët e Asamblesë Parlamentare të Këshillit të Europës. Gjithashtu, Balla thekson se Asambleja Parlamentare e Këshillit të Europës mbështet mbajtjen e menjëhershme të Konferencës së Parë Ndër-Qeveritare BE-Shqipëri.

“Zgjedhjet e 25 Prillit në Shqipëri marrin vlerësim tejet pozitiv nga raporterët e Asamblesë Parlamentare të Këshillit të Europës, e cila mbështet gjithashtu përmes deputetëve të vendeve anëtare të BE mbajtjen e menjëhershme të Konferencës së Parë Ndër-Qeveritare BE-Shqipëri. Raporti i PACE vlerëson se: Votimi ishte i qetë, i sigurtë dhe korniza ligjore siguron respektin e lirive themelore dhe është një bazë e përshtatshme për zgjedhjet demokratike; Reformimi i Komisionit Qendror të Zgjedhjeve, si një institucion i mirëorganizuar dhe transparent; Zbatimi i teknologjive të reja si identifikimi dhe votimi elektronik forcoi besimin e procesit zgjedhor; Ecuria e fushatës, votimit dhe numërimit treguan se këto janë zgjedhjet më të mira të mbajtura ndonjëherë pas peridhës së tranzicionit; Përfaqësimi gjinor u vlerësua në mënyrë të drejtpërdrejtë dhe prioritare: 35% e Kuvendit do të jenë gra. Raporti thekson se qeveria shqiptare përmbushi angazhimet e saj në mbajtjen e zgjedhjeve: Paqësore, të barabarta, të lira dhe të ndershme, në përputhje me standardet e përparuara”, shprehet në reagimin e tij, Sekretari i Përgjithshëm i PS-së, Taulant Balla.