Franca dhe Spanja sërish nën kërcënimin e temperaturave ekstreme, mbi 42°C

Franca dhe Spanja vijojnë të përballen me temperatura ekstreme, termometri drejt 42°C

Vala e të nxehtit do të vazhdojë të prekë Francën dhe Spanjën edhe gjatë ditëve të ardhshme, ndërsa sinjalet për një ulje të temperaturave mungojnë. Sipas parashikimeve meteorologjike, temperaturat pritet të rriten ndjeshëm dhe javën e ardhshme mund të arrijnë deri në 42 gradë Celsius.

Situata mbetet shqetësuese veçanërisht në zonat që janë prekur nga zjarret, pasi mungesa e reshjeve pritet të favorizojë përhapjen e flakëve. Rajonet Ávila dhe Madrid në Spanjë, si dhe Gironde në Francë, janë ndër zonat më të rrezikuara nga kushtet e thata dhe temperaturat e larta.

Në Madrid, për këtë të diel parashikohet mot i kthjellët me diell, ndërsa temperatura maksimale pritet të jetë rreth 31 gradë Celsius, në nivele të ngjashme me ditën e mëparshme.

Sipas Agjencisë Shtetërore Meteorologjike të Spanjës (AEMET), temperaturat do të vijojnë të rriten gradualisht gjatë javës, duke arritur rreth 39 gradë Celsius në mesjavë. Era pritet të fryjë me shpejtësi deri në 20 kilometra në orë, ndërsa mundësitë për reshje mbeten pothuajse të papërfillshme deri të enjten, me vetëm 5% probabilitet.