Ndeshja Liverpool-Arsenal, e vlefshme për fazën gjysmëfinale të EFL Cup është anuluar. “The Reds” së fundmi kanë mësuar daljen pozitive të Jurgen Klopp dhe zëvendësit Pepijn Lijnders.
Të infektuar ka edhe në mesin e lojtarëve dhe në kushte të tilla, drejtuesit e Liverpool insistuan që të shtyhej dueli i programuar për të enjten në mbrëmje.
Kërkesa është marrë parasysh dhe drejtuesit e EFL (English Football League) kanë vendosur shtyrjen e takimit. Sfida e parë do të luhet më 13 janar në “Anfield”, ndërsa pas një jave (20 janar) do të zhvillohet përballja e kthimit në “Emirates Stadium”.
Klubi i Liverpool lajmëron tifozët se biletat e blera për këtë ndeshje do të mbeten të vlefshme për datën e re, më 13 janar, dhe bën të ditur se do të rimbursojë ata që nuk mund të marrin pjesë në datën e riplanifikuar.
