Shkrimtari brazilian Paulo Coelho, thotë se pushtimi rus i Ukrainës ka lëshuar një klimë rusofobie, duke nxitur një polemikë të fortë. Përmes një postimi në Twitter, ai nënvizon po ashtu se kriza e Ukrainës është një justifikim i përshtatshëm për Rusofobinë.
Shkrimtari u dënua gjerësisht nga ndjekësit e tij për këtë deklaratë, shumë prej të cilëve i kërkuan Coelhos të pranonte ndikimin shkatërrues të pushtimit rus dhe të publikonte foto të viktimave dhe shkatërrimeve të shkaktuara nga ushtria ruse.
Duke iu drejtuar kritikave, Coelho vijoi duke shkruar “Isha në Lviv, Kiev, Odessa, Jaltë, Çernobil. Kam përshkuar 10,000 km me tren nga Moska në Vladivostok. Po, ka një luftë, por jo për faj të njerëzve të zakonshëm”.
