Firmosja e marrëveshjes për eksportin e produkteve blegtorale, mes tre ministrive të bujqësisë në kuadër të “Open Balkan”, do t’i mundësojë për herë të parë Shqipërisë shitje në rajon.
Ndikuar nga mungesa e lëndës së parë, por edhe të standardeve të kërkuara nga BE-ja, produktet shtazore deri tani kanë gjetur rrugën e tregtisë vetëm për konsum të brendshëm.
Për ekspertët nisma është pozitive, por fermeri shqiptar mund të ndeshet me një bllokim të tregut nga importi. “Shqipëria ka një ulje 12,2% në blegtori, nuk na favorizon, ne nuk eksportojmë. Jemi defiçitar në mbarështimin e derrit me 60%, gjedhit, si dhe qumështit me 37%, që e zë importi. Marrëveshjet duhet të jenë gjithëpërfshirëse, të përfshijnë shumë fusha të bujqësisë dhe blegtorisë, që mos t’i kemi të copëzuara”,-thotë Ilir Pilku.
Për të garantuar konkurrencë të ndershme, ekspertët sugjerojnë që subvencionet në bujqësi të jenë të barabarta ose të përafërta me vendet e “Open Balkan”, në të kundërt kriza ekonomike do të thellohet edhe më tepër për fermerin shqiptar.
