Pierre-Emerick Aubameyang po e gjen veten të bllokuar tek Chelsea. Sulmuesi gabonez do të dëshironte të largohej nga Chelsea, pasi nuk është ambientuar në Londër, por e vetmja mënyrë që ai mund t’i thotë lamtumirë Stamford Bridge është… rikthimi te Barcelona.
Atletico Madrid është shumë i interesuar për ta marrë. Por ai nuk mund të shkojë te skuadra madrilene. Futbollisti ka luajtur tashmë për dy skuadra në sezonin aktual dhe rregullat e FIFA-s e pengojnë atë të dalë në fushë me tre klube.
Gjithçka për fajin e tetë minutave, ato që Auba luajti me fanellën e Barcelona-s në fillim të vitit, në ndeshjen hapëse të La Liga-s kundër Rayo Vallecano-s.
Nëse do të kishte qëndruar në stol, ish-lojtari i Arsenal-it tani mund të fluturonte për në Madrid. Për shkak të kësaj ai duhet të qëndrojë te Chelsea. Ose, opsioni i vetëm i zbatueshëm, të kthehet përsëri te Barça.
