Daja: Të ringrihemi pas goditjes, synojmë të dy trofetë (VIDEO)

Trajneri i Skënderbeut, Ilir Daja ka dalë sot në konferencë për shtyp në prag të gjysmëfinales së parë të Kupës së Shqipërisë ndaj Flamurtarit. Strategu i korçareve beson se mungesat e shumta nuk do të ndikojnë në ndeshjen e parë.

”Jemi në ditën e fundit të përgatitjeve për gjysmëfinalen. Nuk jemi në aspektin e duhur psikologjik dhe kemi disa mungesa të rëndësishme si dhe disa lojtarë të tjerë janë në pikëpyetje duke përmendur Vangjelin, Osmanin dhe Radas të cilët kanë probleme shëndetësore por mbetet për tu parë dhe seanca e fundit për të përcaktuar lojtarët që do të startojnë nesër. Është një ndeshje e vështirë për vetë faktin se kupa është me sistem eliminimi, ndaj duhet të jemi të kujdessh në të dy fazat e lojës për të bërë të mundur arritjet e objektivit tjetër të klubit, fitimin e kupës”.

GJËNDJA PSIKOLOGJIKE – “Do mundohemi të gjithë si staf dhe lojtarët ta kalojmë këtë gjendje dhe për tu përqendruar tek ajo që është më e rëndësishme për ne, kuadrati i fushës”.

ROTACIONI – “Do të thoja që çdo lojtar i Skënderbeut është këtu sepse ka një meritë në karrierën e tij. Edhe ata lojtarë që kanë pasur një minutazh të vogël duhet të tregojnë nesër se janë këtu për të bërë më të mirën qoftë për vetëm e tyre, qoftë për Skënderbeun”.

KUPA E SHQIPËRISË – “Është një trofe i munguar për klubin dhe ne do luftojmë fort për ti sjellë këtij qyteti të mrekullueshëm të dy trofetë në fund të sezonit”.