Gjoka “diktator” me lojtarët, zbulon programin e detajuar në Instagram

Kukësi ka filluar përgatitjet për pjesëmarrjen në turin e parë kualifikues të Europa League. Skuadra verilindore synon një kualifikim të mundshëm ndaj Debrecenit, për të pasur mundësi për të sfiduar më pas Romën. Trajneri Ernest Gjoka nuk kërkon që t’i shpëtojë asnjë detaj nga përgatitjet duke vendosur një program të veçantë për futbollistët.

Strategu verilindor ka ndarë në rrjetet sociale programin për ditën e sotme, që fillon që në orën 7:30 me konsumimin e mëngjesit. Më pas ekipi në orën 9:30 stërvitet në palestër, ndërkohë që dreka është konsumuar në orën 12:30.

Në 17:15 ekipi niset për të kryer stërvitjen në Elbasan, ndërkohë që në orën 20:30 konsumon darkën. Gjoka u ka lënë vetëm një orë të lirë në mbrëmje për kafe 21:00-22:00, ndërkohë që në orën 22:00, të gjithë lojtarët duhet të jenë në dhomat e tyre. Një disiplinë e hekur e strategut të verilindorëve, i cili po kryen fazën e parë përgatitore para nisjes për në Ohër. /R.Lika-Koha Jone/