Kapello i drejtpërdrejtë: Mungon kualiteti, Italia duhet ta nisë gjithçka nga zero

Fabio Kapello, trajneri i njohur italian, pavarësisht se nuk do të jetë në drejtimin e ndonjë skuadre nuk do të mungojë në Botërorin rus, por këtë herë si analist sportiv.

Fakti që i dhemb shumë Kapellos është se nuk mund të bëjë tifo për Italinë e tij.

“Ishte shumë e trishtueshme të shikoje Italinë të mos kualifikohej në Botëror, – ka pohuar trajneri i njohur italian për “Fifa.com”. – Kemi qenë protagonistë të botërorëve dhe jemi katër herë fitues. Por në këtë moment futbolli italian nuk ka shumë lojtarë me talent dhe kualiteti në ekip nuk është i lartë.

Është momenti ta nisim punën nga zero që të kuptojmë ku kemi gabuar dhe mbi të gjitha të përpiqemi të prodhojmë diçka ndryshe, të bazuar në karakteristikat e lojtarëve italianë, pa kopjuar të tjerët.”

Duke iu kthyer së kaluarës, Kapelo shpreh keqardhjen që nuk mori pjesë në botërorin e Argjentinës në 1978-ën: “Mbeta shumë i zhgënjyer që e humba atë Botëror. Kisha luajtur në të gjitha ndeshjet kualifikuese, por mbeta jashtë skuadrës. Një mëkat edhe sot për mua”, – ka thënë Kapelo.