UEFA dënon sërish Serbinë për shkak të koreve raciste, e pëson edhe Mali i ZI

Serbia dhe Mali i Zi do të luajnë me dyer të mbyllura, pa tifozë ndeshjet e ardhshme kualifikuese te Euro 2024, në 19 nëntor, respektivisht kundër Bullgarisë dhe Hungarisë.

Vendimi është marrë nga UEFA për episodin e radhës të koreve raciste të tifozëve të të dy skuadrave në sfidën Serbi-Mali i Zi të 17 tetorit të kaluar, të fituar 3-1 nga vendasit. Për sjellje raciste i njëjti vendim ishte marrë ndaj dy skuadrave edhe në ndeshjen e parë të luajtur në mars të 2023.

Përveç dënimit për të luajtur me dyer të mbyllura, Federata Serbe është ndëshkuar me 90 mijë euro gjobë pasi “nuk ka marrë masa kundër shitjes së biletave në tregun e zi”, ndërkohë që 20 mijë euro do të paguhen nga Federata e Malit të Zi.