United blindon De Gean me 350 mijë paund në javë

David De Gea duket se do të vazhdojë që të mbetet pjesë e Manchester United edhe në të ardhmen. Gardiani spanjoll do të firmosë një kontratë të re me “Djajtë e Kuq” duke hedhur poshtë mundësinë e një largimi gjatë kësaj vere. E përditshmja britanike “The Sun” shkruan se portieri do të nënshkruajë një kontratë 5-vjeçare me Manchester United.

Nga marrëveshja e re ai pritet të arkëtojë 350 mijë paund në javë, duke u bërë portieri më i paguar në botë. Kontrata aktuale e De Gea me United skadon verën e ardhshme. Shpesh është përfolur se portieri do të rikthehet në Spanjë, në vendlindjen e tij.

De Gea pritet të rinovojë kontratë me “djajtë” deri në vitin 2024. David de Gea luan me Manchester United që prej vitit 2011, duke e veshur fanellën e këtij ekipi në 362 ndeshje. Edhe pse u vendos në qendër të vëmendjes në fundin e sezonit, ai sërish ka besimin e trajnerit Solskjaer.