Përfaqësuesi i Lartë i Bashkimit Europian për politikë të jashtme, Josep Borrell këtë të premte takoi në Paris, kryeministrin e Kosovës, Albin Kurtin dhe presidentin e Serbisë, Aleksandër Vuçiç. Mesazhi që ai përçon, është ”nuk duhet të kemi një tjetër luftë në tokën europiane”.
Borrell dhe ndërmjetësuesi Miroslav Lajçak, ofruan recetën për tejkalimin e tensioneve të fundit, të bazuar në respektimin e marrëveshjeve të firmosura në kuadër të dialogut.
”Serbët e Kosovës duhet të kthehen menjëherë në institucionet e Kosovës dhe të rifillojnë detyrat e tyre, dhe Kosova duhet t’i harmonizojë veprimet e saj për targat me marrëveshjet e kaluara të Dialogut dhe të nisë negociatat për themelimin e Asociacionit/Bashkësisë së komunave me shumicë serbe pa vonesa të mëtejshme”,-tha Borrell.
