Juventusi dhe Milani luajtën këtë mëngjes në Amerikë, një ndeshje miqësore, që do të mbyllej në barazim 2-2 në kohën e rregullt, por që do të fitohej me penallti nga bardhezinjtë.
Mbrojtësi Thiaë kaloi Milanin në avantazh falë një goli me kokë në minutën e 23-të, por Juventusi barazoi dhjetë minuta më vonë me anë të brazilianit Danilos.
Festa e bardhezinjve zgjati vetëm gjashtë minuta, pasi Oliver Giroud riktheu skuadrën e Piolit në avantazh. Juvja reagoi sërish sapo filloi pjesa e dytë. Daniele Rugani shtangu Mike Maignan dhe vendosi barazimin 2-2.
Penalltitë prodhuan emocione, me portierët Carlo Pinsoglio dhe Marco Sportiello që kryen disa pritje. Në fund festuan bardhezinjtë, ndërkohë që nga ana e Milanit gabuan Romero, Pobega dhe 17-vjeçari Bartesaghi.
“Zonja” luan miqësoren e radhës në tokën amerikane përballë Real Madrid (3 gusht), ndërkohë që Milani do të sfidojë Barcelonën (2 gusht).
