Belgjika shpartallon Tunizinë, dopietë për Hazard dhe Lukakun (VIDEO)

Belgjika dhuron spektakël ndaj Tunizisë duke siguruar një biletë për në fazën tjetër. Ekipi i Martinez ka mundur me lehtësi Tunizinë në shifrat 5-2, teksa dy yjet e sfidës së sotme ishin Eden Hazard dhe Romelu Lukaku me nga dy gola secili, dhe Batshuayi një gol në fundin e takimit.

Ndeshja në fakt nisi me një gabim të arbitrit, i cili akordoi penallti që në minutën e 6-të për belgët, për një faull ndaj Hazard në hyrje të zonës. Nga pika e bardhë shkoi vetë Hazard, që zhbllokoi ndeshjen. Në minutën e 16-të do të ishte Lukaku, që mori një pasim fantastik nga Mertens dhe më pas mposhti portierin.

Tunizia reagoi menjëherë duke ngushtuar shifrat me Bronn në minutën e 18-të, por për të shuar shpresat e tyre mendon Lukaku, i cili në fundin e pjesës së parë shënon golin e tretë, dhe të katërtin në Kupën e Botës, duke barazuar Cristiano Ronaldon.

Në fillimin e pjesës së dytë Belgjika shënoi dhe golin e katërt me Hazard, i cili përfitoi nga një gabim në vendosjen e mbrojtjes tuniziane. Në fundin e ndeshjes ka kohë për të shënuar emrin në listën e shënuesve edhe për Batshuayin. Në minutën e fundit të shtesës Khazri realizoi golin e dytë në portën e Courtois, që vlen sa për statistika. /Koha Jonë/