Deshamp reagon pas largimit të Zidane: Një ditë do të drejtojë Francën, por s di kur …

Trajneri i Francës, Diedier Deshamp, nuk ka mundur të evitojë të ardhmen e Zidane në konferencën për shtyp në prag të miqësores ndaj Italisë. “Ky është vendimi i tij dhe e respektoj. Duke e njohur shumë mirë Zizu-në, besoj se e ka menduar gjatë këtë hap dhe është bindur se është vendimi më i mirë për të.

Sigurisht që një ditë do të jetë trajner i Kombëtares franceze. Kur? Këtë nuk mund ta them unë”, është shprehur Didier Deschamps. Shokë skuadre për shumë vite e trofe, Deshamps nuk e fsheh “irritimin” për pyetjet e shumta drejtuar tij në lidhje me Zidane, teksa të shumtë janë ata që do ta donin francezin e Realit në vendin e teknikut të Francës.

“E respektoj vendimin e Zidane, e me siguri është më i miri i mundshëm. Besoj se ka reflektuar gjatë para se të hedhë këtë hap. A e shtonin presionin (pozitiv) ndaj meje ky zhvillim? Nuk e di. Mua më njihni, tani për tani jam i fokusuar vetëm te Kupa e Botës. Pas këtij kompeticioni do të kemi kohë të flasim për të tilla gjëra. E sigurt është se nuk do të jem unë, ai që do t’i dorëzoj atij çelësat e Francës, por presidenti i Federatës sonë. Mendoj se Zidane duhet ta shijojë pushimin e merituar me familjen e tij. Sinqerisht nuk kam dyshime mbi veten time, askush nuk mund të ma prishë qetësinë”, ka thënë strategu francez.