Marku: Serbi do të flejë gjumë që në raundin e parë!

Florian Marku do të përballet nesër pasdite në “Asllan Rusi” me serbin Sladian Dragisiç në një ndeshje MMA-je të cilën ai vetë ka premtuar se do ta mbyllë shpejt duke e hedhur KO kundërshtarin.

Dy boksierët sot bënë edhe prezantimin zyrtar në ambientet e një hoteli në kryeqytet. Që kur ka kaluar nga KickBox-i në Mix Martial Arts, Marku ka fituar të pesta përballjet dhe shpreson të bëjë të njëjtën gjë edhe këtë herë përballë serbit në Tiranë.

“Mezi po e pres këtë ndeshje përpara publikut tim. Jam shumë i motivuar. Kjo është ndeshja ime e gjashtë dhe do të jetë fitorja ime e gjashtë. Kjo është e sigurt. Kam pesë ndeshje, të gjitha me fitore dhe të gjitha të mbyllura me KO në raundin e parë ose të dytë,

Për Sladianin kam respekt, e falënderoj që ka ardhur në mes të Tiranës. Ne jemi mikpritës dhe do ta presim me gjithë të mirat, por deri në momentin që do të hyj në kafaz. Aty… nëse ndeshja do të zhvillohet në grusht, ju premtoj se Sladian do të flejë gjumë që në raundin e parë”, tha Marku në konferencën për shtyp pas peshimit zyrtar.