Walker bën tripletë shkeljesh gjatë karantinimit në harkun e 24 orëve

Kyle Walker nuk i ka aspak mirë punët me thyerjen e rregullave në periudhën e karantinimit. Ai u kap një muaj më parë duke shkelur rregullat dhe u gjobit me 150 mijë sterlina nga Manchester City.

Mbrojtësi i kombëtares angleze ka arritur të shkelë rregullat e koronavirus-it plot tre herë në 24 orë, mes së mërkurës dhe së enjtes. “The Sun” ka dokumentuar veprimet e mbrojtësit, i cili ka shkuar në fillim në shtëpinë e motrës Laura për të marrë pjesë në festën e ditëlindjes së saj, ku ka qëndruar për dy orë.

Më pas ka shkuar në Sheffield te prindërit e tij dhe në fund ka dalë për një xhiro me biçikletë me një mikun e tij. Walker tani rrezikon një gjobë tjetër dhe vendin në kombëtare.