115 ditë qëndroi si kryeministër i Malit të Zi, shqiptari Dritan Abazoviç. Kuvendi votoi mosbesimin ndaj qeverisë së Abazoviçit, një orë pas mesnatës së 20 gushtit. Qeveria e tij u rrëzua me 50 vota pro dhe një kundër.
Tashmë i mandatuari me krijimin e qeverisë së re teknike, mund të jetë një person jashtë partive politike. Shihet me prioritet mundësia e caktimit të një individi të përfshirë prej dy dekadash në sektorin e OJQ-ve, i cili ka kontakte të mira në qarqet ndërkombëtare dhe i vjen “pas shijes” përfaqësuesve të këtij komuniteti.
Në këtë mënyrë, do të bëhej një përpjekje për të qetësuar elektoratin e demokratëve nëse ambasadat me ndikim arrijnë t’i bindin ata të formojnë një qeveri teknike me mbështetjen e pakicës së Partisë Demokratike të Socialistëve (DPS) të presidentit të shtetit Milo Gjukanoviq. Për momentin askush nuk e ka shumicën për të formuar një qeveri të re.
