Erdgys Arrazi thotë se në këto momente nuk mund të flasë për tragjedinë, ku gruaja dhe tre fëmijët u vetëhodhën në lumin Buna, sepse nuk është në gjendje emocionale. “Në këto momente nuk mund të flas sepse nuk jam në gjendje emocionale. Jam dakord me deklarimet e avokatit dhe mund të flas në një moment më të vonë”.
Avokati mbrojtës, Blerim Bazhdari kërkoi në seancën për masën e sigurisë lirimin e Erdgys Arrazit, pasi nuk ka asnjë provë që vërteton dhunën në familje që pretendon policia dhe prokuroria apo edhe motra e viktimës. Pala mbrojtëse paraqiti një prej recetave mjekësore të Alma Arrazit që sipas avokatit vërteton se 39 vjeçarja vuante nga probleme të shëndetit mendor.
Receta është lëshuar nga mjeku Gjon Preçi me firmën dhe vulën e tij. Pala mbrojtëse tha se nuk ka asnjë provë se Erdgysi është shkaktar i vetëvrasjes të 39-vjeçares ndërsa tha se ndalimi është i paligjshëm dhe se klienti duhet që të lirohet sepse nuk ka asnjë provë nga policia apo prokuroria.
Avokati mbrojtës sqaroi edhe lidhjen e pretenduar të Erdgys Arrazit duke thënë se edhe nëse ka patur kjo nuk përbën një vepër penale. Pala mbrojtëse hodhi poshtë çdo pretendim mbi dhunën psikologjike që pretendon policia dhe prokuroria dhe se për këtë mungojnë provat.
Sipas tij Erdgysi është një prind që është kujdesur për familjen e tij dhe se ka patur një marrëdhënie normale me bashkëshorten, e cila kreu aktin e rëndë të vetëvrasjes dhe mbytjes së 3 fëmijëve.
