Formimi i një “superkontinenti” të ri mund të zhdukë njerëzimin dhe të gjithë gjitarët e tjerë për 250 milionë vjet, kanë parashikuar studiuesit.
Duke përdorur superkompjuterat, shkencëtarët nga Universiteti i Bristolit në Mbretërinë e Bashkuar parashikuan se si ekstremet klimatike do të intensifikoheshin dhe kontinentet e botës të bashkohen për të formuar një superkontinent, Pangea Ultima, në rreth 250 milionë vjet.
Ata zbuluan se do të ishte jashtëzakonisht e nxehtë, dhe Toka do të bëhej praktikisht e pabanueshme për njerëzit dhe gjitarët.
Studiuesit simuluan tendencat e temperaturës, erës, shiut dhe lagështisë për superkontinentin dhe përdorën modele të lëvizjes së pllakave tektonike, kimisë së oqeanit për të llogaritur nivelet e dioksidit të karbonit.
Ata zbuluan se jo vetëm që formimi i Pangea Ultima do të çonte në shpërthime më të rregullta vullkanike, duke nxjerrë dioksid karboni në atmosferë dhe duke ngrohur planetin, por edhe dielli do të bëhej më i ndritshëm, duke emetuar më shumë energji dhe duke ngrohur më tej Tokën, vunë në dukje ekspertët në studimin e botuar në revistën Nature Geoscience.
