Ulja e notës mesatare në 6.5 për pranimet në Universitet, nga rektorët shihet si pozitive për degët të cilat rrezikonin të mbylleshin. Së bashku me uljen e pragut hyrës në universitete, shumë shpejt pritet të miratohet edhe mbështetja me bursë për studentët që do të zgjedhin të studiojnë në agronomi, zooteknikë, peshkim dhe inxhinieri pyjesh.
Këshilli i Ministrave miratoi vendimin për uljen e notës mesatare për pranimin e studentëve në disa degë. Sipas vendimit të qeverisë, nga 7.5 nota mesatre e pranimit në universitet ulet në 6.5.
Ky ndryshim i notës mesatare përfshin vetëm maturantët që nuk duan të bëhen mësues. Maturantët që përfundojnë arsimin e mesëm, minimalisht me notë mesatare 6.5, mund të aplikojnë për programe studimi të gjuhëve të huaja, si dhe për disa programe të tjera që kanë synim profesione të ndryshme, përveç mësuesisë.
