Vllaznia nuk ka lënë në harresë as talentet e rritur në akademinë e klubit, pasi sot ka firmosur me një tjetër prej tyre. Bëhet fjalë për 19-vjeçarin Klejdi Paloka, i cili në ekipet e moshave të Vllaznisë ka treguar se mund të luajë si në mbrojtje, ashtu edhe në mesfushë dhe sot ka firmosur një kontratë 5-vjeçare me kuqeblutë.
Paloka bëhet futbollisti i tretë nga akademia, që firmos një kontratë afatgjatë me kuqeblutë, pasi më herët kanë firmosur për 5 sezone edhe mbrojtësi Geralb Smajli e sulmuesi Mersian Muliu.
Këta futbollistë do të luajnë rregullisht te Vllaznia B dhe njëkohësisht do të kenë mundësi të tregojnë vlerat edhe para trajnerit Thomas Brdariç, me shpresën për të marrë sa më shumë minuta edhe në skuadrën e parë.
Kontratat 5-vjeçare janë dëshmi se klubi i Vllaznisë beson shumë te talenti dhe cilësitë e këtyre elementëve, të cilët pritet të shndërrohen në bazën e ekipit gjatë sezoneve të ardhshme.