Grupi legjendar i popit suedez, ABBA, do të jetë në Top 10 Singles në Britaninë e Madhe pas gati 40 vjetësh, me dy këngë të reja nga albumi i tyre i ardhshëm “Voyage”.
“I Still Have Faith in You” (“Ende besoj te ti”) dhe “Don’t Shut Me Doën” (“Mos më refuzo”) renditen përkatësisht në vendin e 6-të dhe të 7 -të në klasifikimet britanike, sipas vlerësimeve të publikuara dhe të bazuara në shitjet e para dhe transmetimet.
“Nëse vrulli vazhdon, këto këngë do të jenë këngët e para të ABBA-ve që do të shfaqen në Top 10 të BM që nga “One Of Us” në dhjetor 1981”, tha organizata përgjegjëse për klasifikimet.
“I Still Have Faith in You” ka siguruar shitje të mëdha të CD-ve dhe vinileve, ndërsa “Don’t Shut Me Doën” është kënga më e shkarkuar në BM deri më tani, këtë javë”, vazhdoi organizata, duke shtuar se të dy titujt janë transmetuar mbi 500 000 herë deri më sot.
Dy këngët e reja janë marrë nga “Voyage”, albumi i parë në studio i ABBA-ve, që nga “The Visitors” në 1981.
Katër anëtarët e ABBA-ve, një akronim i përbërë nga inicialet e emrave të tyre të parë (Anni-Frid Lyngstad, 75; Agnetha Fältskog, 71; Björn Ulvaeus, 76; Benny Andersson, 74) u ndanë në 1982.
“Voyage”, një album me 10 këngë, që përfshin tetë këngë të reja dhe dy versione të reja (“Just a Notion” dhe “Bumblebee”), do të publikohet më 5 nëntor.
